ពិសាកាហ្វេ និង ទឹកតែ ជួយកាត់បន្ថយអត្រាស្លាប់ ក្នុងចំណោមស្រ្តីមានជំងឺទឹកនោមផ្អែម

តែ និង កាហ្វេ ​គឺជា​ភេសជ្ជៈ​ពីរ​ប្រភេទ​ដែល​កំពុង​ពេញនិយម​នៅលើ​ពិភពលោក ហើយ​វា​ក៏​ជា​ភេសជ្ជៈ​ដែលមាន​គុណសម្បត្តិ​ច្រើន​ចំពោះ​សុខភាព និង ត្រូវបាន​អ្នកស្រាវជ្រាវ​ធ្វើការ​សិក្សា​ពី​គុណសម្បត្តិ​របស់​វា ។ តាម​ការសិក្សា​ជាច្រើន​បានឱ្យដឹងថា តែ និង កាហ្វេ​ អាចជួយ​កាត់បន្ថយ​អត្រា​ប្រឈម​កើត​ជំងឺ​ទឹកនោមផ្អែម​បាន ជាពិសេស​ក្នុងចំណោម​ស្ត្រី​ដែលមាន​កើត​ជំងឺ​ទឹកនោមផ្អែម​ហើយ​នោះ ​គឺ​វា​អាចជួយ​កាត់បន្ថយ​មិនឱ្យ​ជំងឺ​វិ​វ​ឌ្ឈ​ន៍ទៅរក​សភាព​ធ្ងន់ធ្ងរ​បាន ។

​​មនុស្សពេញវ័យ​ជាង ៨០ ភាគរយ​នៅ​ទូទាំង​ពិភពលោក​បាន​ពិសា​កាហ្វេ និង ទឹកតែ ​ជា​រៀងរាល់ថ្ងៃ ហើយ​តាម​ការសិក្សា​អ្នកជំនាញ​បានស្នើ​ឱ្យ​អ្នក​ពិសា​តិច​បំផុត​ត្រឹម​ចំណុះ ១០០ មី​លី​ក្រាម ក្នុង​មួយថ្ងៃ ។ ការសិក្សា​នេះ​គឺ​គេ​បានធ្វើ​ឡើយ​ដោយ​សាកលវិទ្យាល័យ University of Porto ក្នុងប្រទេស​ព័រ​ទុយ​ហ្គា​ល់ ដោយបាន​សិក្សា​ទៅលើ​កម្រិត​សារធាតុ​កាហ្វេ​ដែល​បាន​ពិសា និង អត្រា​មរណភាព​ទៅលើ​ក្រុម​បុរស និង ស្ត្រី​ជាង ៣០០០ នាក់ ដែលមាន​ជំងឺ​ទឹកនោមផ្អែម​ក្នុង​ចន្លោះ​ឆ្នាំ ១៩៩៩ ទៅ ២០១០ ។​

​​ក្នុង​រយៈពេល​សិក្សា​តាមដាន ១១ ឆ្នាំ​ក្រោយមក ក្នុងចំណោម​មនុស្ស​ដែលមាន​ជំងឺ​ទឹកនោមផ្អែម​ចំនួន ៦១៨ នាក់​បាន​ស្លាប់ អ្នកស្រាវជ្រាវ​រកឃើញ​ថា ស្ត្រី​ដែល​ពិសា​កាហ្វេ​យ៉ាងហោចណាស់ ១០០ មី​លី​ក្រាម ឬ មួយ​ពែង​ក្នុង​មួយថ្ងៃ គឺមាន​អត្រា ៥១ ភាគរយ​ប្រឈម​នឹង​ការស្លាប់​តិចជាង​អ្នក​មិនបាន​ពិសា​កាហ្វេ​ និង តែ ។ ​ចំពោះ​ស្ត្រី​ដែលមាន​ជំងឺ​ទឹកនោមផ្អែម​ហើយ​ពិសា​កាហ្វេ ពី ១០០ ទៅ ២០០ ក្រាម​ក្នុង​មួយថ្ងៃ មាន​អត្រា ៥៧ ភាគរយ ប្រឈម​ការស្លាប់​តិចជាង​ស្ត្រី​ដែល​មិន​ពិសា ។ ហើយ​បើ​ស្ត្រី​ទាំងនោះ​ពិសា​លើសពី ២០០ មី​លី​ក្រាម ឬ ​ប្រហែលជា ២ ពែង​ក្នុង​មួយថ្ងៃ គឺអាច​កាត់បន្ថយ​អត្រា​ស្លាប់​បាន ៦៦ ភាគរយ ។

​បន្ថែម​ពីនេះ​ការសិក្សា​ក៏​បង្ហាញ​ឱ្យដឹង​ដែរ​ថា វា​អាចជួយ​កាត់បន្ថយ​អត្រា​ប្រឈម​ជំងឺមហារីក​បាន ៨០ ភាគរយ​ជាង​អ្នក​ដែល​មិន​ពិសា កាហ្វេ និង តែ​សោះ ។ លទ្ធផល​នៃ​ការសិក្សា​នេះ ​គឺ​ដោយសារ​ប្រសិទ្ធិភាព​នៃ​សារធាតុ​កាហ្វេ​អ៊ីន​តែម្តង​ដែល​បាន​ជះឥទ្ធិពល​ដល់​មុខងារ​បេះដូង និង ជួយ​ការពារ​មិនឱ្យ​ប្រឈម​នឹង​គ្រោះថ្នាក់​នៃ​ជំងឺមហារីក ៕ សុផល (​ប្រភព​៖ zeenews.com)

ចូលចិត្តអត្ថបទថ្មីៗទាក់ទងសុខភាព និងសម្រស់​​ សូមចុច