មើលជោគជាតា តាមហោរាសាស្ត្រ​ប្រចាំខែកញ្ញា ឆ្នាំ ២០១៧

​ឆ្នាំជូត​​

​រាសី​ខ្ពស់ត្រដែត ។ រាល់​កិច្ចការងារ​រកស៊ី​ជួញដូរ​កាក់កប​ល្អ ។ កំឡុង​ពេលនេះ​បើទោះជា​មាន​បញ្ហា ឬ ឧបសគ្គ​នៅ​ពីមុខ​ក្ដី នឹង​អាច​ដោះស្រាយបាន​យ៉ាង​ល្អ ។ ដោយឡែក​បញ្ហា​ដែល​ស្មុគស្មាញ​ជំពាក់ជំពិន​ជាមួយ​នរណាម្នាក់​ពេលមុន​ក៏​អាច​ប្រែ​មកជា​ងាយស្រួល ។ រយៈពេល​នេះ​បើទោះបីជា​មានការ​ចំណាយ​ច្រើន ប៉ុន្តែ​ក៏មាន​ចំណូល​ចូលមក​វិញ​ដែរ ។ អ្នក​ប្រកបការងារ​តាម​បណ្តា​ក្រសួង​មន្ទីរ រោងចក្រ ឬ ក្រុមហ៊ុន​នានា មានឱកាស​សាង​គុណសម្បត្តិ ការងារ​ដំណើរការ​ដោយ​រលូន ជា​ពេល​ដ៏​ស័ក្ដិសម​ក្នុងការ​បង្កើត​ទំនាក់ទំនង ។ សុខភាព​ល្អ តែ​បុគ្គល​វ័យ​ចំណាស់​តោង​ប្រយ័ត្ន​ដួល​របួស ។ ចំពោះ​សម្ព័ន្ធភាព​ស្នេហា​គូ​ស្វាមីភរិយា​មាន​ភាព​ល្អូកល្អិន​ណាស់ ។ អ្នក​នៅ​លីវ​អាចមាន​ឱកាស​ជួប​គូគាប់​ភ្ជាប់​និស្ស័យ​ជាមួយគ្នា ។

​ឆ្នាំឆ្លូវ

​​រាសី​ឡើង​ខ្ពស់ត្រដែត ។ រាល់​កិច្ចការងារ​រកស៊ី​ជួញដូរ​កាក់កប​ល្អ ។ ក្នុងអំឡុង​ពេលនេះ​បើទោះបី​​ជាមាន​ឧបសគ្គ ក៏​អាច​ដោះស្រាយបាន​គ្រប់​កាលៈទេសៈ និង មានទ្រព្យ​ហូរ​ចូល ប៉ុន្តែ​កុំ​លោភលន់​ពេក​​ក្រែង​នាំ​ជា​គ្រោះ​មកវិញ ។ ចំពោះ​អ្នក​ប្រកបការងារ​តាម​បណ្តា​ក្រសួង​មន្ទីរ រោងចក្រ ឬ ក្រុមហ៊ុន​នានា នឹងមាន​អ្នក​ជួយ​ជ្រោមជ្រែង ជា​ឱកាស​បញ្ចេញស្នាដៃ​បន្ថែមទៀត ។ សុខ​ភាពល្អ​ធម្មតា តែ​តោង​ប្រយ័ត្ន​​អនាម័យ​ចំណីអាហារ​ដែល​បរិភោគ ។ សម្ព័ន្ធភាព​គូ​ស្វាមីភរិយា អាចមាន​ការផ្លាស់ប្តូរ​ខ្លះ ហេតុនេះ​ត្រូវ​ចេះ​​យល់​អធ្យាស្រ័យ​គ្នា ទើប​នៅ​ជាមួយគ្នា​បានយូរ​អង្វែង ។ អ្នក​នៅ​លីវ​នឹងមាន​ឱកាស​ជួប​ស្នេហា​ដែល ស្រស់បំព្រង ។

​ឆ្នាំខាល​​

​រាសី​ល្អ​មធ្យម​។  រាល់​កិច្ចការងារ​រកស៊ី​ជួញដូរ​ធម្មតា ។ រយៈ​ពេលនេះ​ត្រូវ​យកចិត្តទុកដាក់​ពី​រឿង​ចំណូល​ចំណាយ​ផង ព្រោះ​អាចមាន​ការចំណាយ​ខ្ជះខ្ជាយ​ច្រើន​ហួស​ពី​ការរំពឹងទុក ដូច្នេះ​ត្រូវ​ចេះ​ទប់ចិត្ត​ខ្លះ​ចំពោះ​ការចំណាយ​ដែល​មិនចាំបាច់ ។ ចំពោះ​អ្នក​ប្រកបការងារ​តាម​បណ្តា​ក្រសួង​មន្ទីរ រោងចក្រ ឬ ក្រុមហ៊ុន​នានា មាន​ឧបសគ្គ​ច្រើន គម្រោង​ការងារ​ដែល​គ្រោង​ធ្វើ​អាច​នឹងមិន​បានសម្រេច​ឡើយ ។ អំឡុង​ពេលនេះ​ត្រូវ​ប្រយ័ត្នប្រយែង​ពី​ទំនាក់ទំនង​ជាមួយ​មិត្ត​រួមការ​ងារ និង ថ្នាក់លើ បើ​ធ្វេសប្រហែស​អាច​នឹង​ប៉ះពាល់​ដល់​អនាគត​ខ្លួន​ទៅ​ថ្ងៃក្រោយ ។ សុខភាព​ធម្មតា តែ​ត្រូវ​ប្រ​យ​ត្ន័​ប្រយែង​ចំណីអាហារ​ប៉ះពាល់​ថ្លើម និង ក្រពះ ។ សម្ព័ន្ធភាព​ស្នេហា ងាយ​នឹង​ប្រេះឆា ដូច្នេះ​ត្រូវ​ចេះ​យកចិត្តទុកដាក់​ចំពោះ​ដៃគូ​បន្តិច​ដើម្បី​កុំ​ឲ្យ​​មនោសញ្ចេតនា​បែកបាក់ ។

​ឆ្នាំថោះ​​

​រាសី​ឡើង​ខ្ពស់ត្រដែត ។  រាល់​កិច្ចការងារ​រកស៊ី​ជួញដូរ​កាក់កប​ទៅ​មុខជា​លំដាប់ ។  កំឡុងពេល​​នេះ អ្នក​អាចធ្វើ​ការវិនិយោគ ឬ បណ្ដាក់ទុន​បាន ព្រមទាំង​មានទ្រព្យ​ហូរ​ចូល​ដោយ​មិនដឹង​ខ្លួន ។ ចំពោះ​អ្នក​ប្រកបការងារ​តាម​បណ្តា​ក្រសួង មន្ទីរ រោងចក្រ ឬ ក្រុមហ៊ុន​នានា មានឱកាស​បញ្ចេញស្នាដៃ រាល់​គម្រោង​ការងារ​នឹង​ទទួលជោគជ័យ ហេតុនេះ​ត្រូវ​ចាប់​ឱកាស​នេះ​ឲ្យ​បានល្អ ។ សុខភាព​ល្អ តែ​បុគ្គល​វ័យ ចំណាស់​តោង​ប្រយ័ត្ន​ដួល​របួស ។ សម្ព័ន្ធភាព​គូ​ស្វាមីភរិយា​មាន​សភាព​បត់បែន​ខ្លះ អាស្រ័យ​លើ​ការប្រាស្រ័យ​ទាក់ទង​គ្នា ។ ឯ​អ្នក​នៅ​លីវ​មានឱកាស​ជួប​មនុស្ស​មាន​និស្ស័យ ។

​ឆ្នាំរោង​​

​រាសី​ស្រុតចុះ ។ រាល់​កិច្ចការងារ​រកស៊ី​ជួញដូរ​មិន​កាក់កប​ប៉ុន្មាន​ឡើយ ។ កំឡុង​ពេលនេះ​រឿងរ៉ាវ​ដែល​កើតឡើង​ត្រូវ​ប្រញាប់​ដោះស្រាយ​កុំ​អូសបន្លាយ​យូរពេក ។ ចំពោះ​អ្នក​ប្រកបការងារ​នៅតាម​បណ្តា​ក្រ សួង​មន្ទីរ រោងចក្រ ឬ ក្រុមហ៊ុន​នានា ការងារ​មាន​ភាព​រាំងស្ទះ មាន​មនុស្ស​ច្រណែនឈ្នានីស​ពីក្រោយ​ខ្នង ប៉ុន្តែ​ត្រូវ​ព្យាយាម​អត់ធ្មត់​កុំ​បង្ករឿង​ឲ្យ​ធំដុំ​ឲ្យ​សោះ ។ សុខភាព​ធ្លាក់​ចុះខ្សោយ ព្រោះ​នឿយហត់​ច្រើន ហេតុនេះ​គួរ​លៃលក​ពេលវេលា​សម្រាក​ខ្លះ ។  ចំពោះ​សម្ព័ន្ធភាព​គូ​ស្វាមីភរិយា ត្រូវ​ចេះ​តមមាត់​តម​សម្តី​ក្រែង​បែកបាក់​ព្រោះតែ​សម្តី ។

​ឆ្នាំម្សាញ់​​

រាសី​ធ្លាក់ចុះ ។ រាល់​កិច្ចការងារ​រកស៊ី​មានការ​ថយចុះ ។ កំឡុង​ពេលនេះ​ត្រូវ​ប្រយ័ត្នប្រយែង​ការ​​ចំណាយ​ដែល​មិនចាំបាច់ មិន​ដូច្នេះ​នឹង​ជួប​បញ្ហា​សេដ្ឋកិច្ច ។  ចំពោះ​អ្នក​ប្រកបការងារ​តាម​បណ្តា​ក្រសួង​​មន្ទីរ រោងចក្រ ឬ ក្រុមហ៊ុន​នានា  មានរឿង​ឈឺក្បាល និង ស្មុគស្មាញ​ច្រើន តែ​ត្រូវ​អត់ធ្មត់​ហើយ​ដោះស្រាយ​សន្សឹមៗ ។ រយៈ​ពេលនេះ​សុខភាព​មិនសូវ​ជា​ល្អ​ទេ​ងាយ​រង​ប៉ះពាល់​ដោយ​បញ្ហា​ថ្លើម ប្រមាត់ និង​ប្រព័ន្ធ​ដកដង្ហើម ដូច្នេះ​តោង​យកចិត្តទុកដាក់​ពី​ចំណីអាហារ និង ការ​សម្រាក​ឲ្យ​បាន​គ្រប់គ្រាន់ ។   សម្ព័ន្ធភាព​គូ​ស្វាមីភរិយា​មាន​ភាព​រកាំ​រ​កូ​ស​ច្រើន ហេតុនេះ​ត្រូវ​ចេះ​អត់ឱន​ឲ្យ​គ្នា​ទៅវិញទៅមក​ទើប​មាន​សេចក្ដីសុខ​ក្នុង​គ្រួសារ ។

​ឆ្នាំមមី​​

​រាសី​ឡើង​ខ្ពស់ត្រដែត ។ រាល់​កិច្ចការងារ​រកស៊ី​ជួញដូរ​មានការ​រីកចម្រើន​លូតលាស់​ទៅមុខ​ជា​លំ ដាប់ ។ រយៈ​ពេលនេះ​នឹងមាន​អ្នក​ជ្រោមជ្រែង​ជួយ​អ្នក​ឲ្យ​សម្រេច​កិច្ចការ​នានា​ជាច្រើន ។  ចំពោះ​អ្នក​ប្រក ប​ការងារ​តាម​បណ្តា​ក្រសួង​មន្ទីរ ក្រុមហ៊ុន ឬ រោងចក្រ​នានា​ការងារ​ដំណើរការ​រលូន​ល្អ ទំនាក់ទំនង​ជាមួយ​អ្នក​ជុំវិញខ្លួន​ក៏​ល្អ ។ កំឡុង​ពេលនេះ ត្រូវ​ចាប់អារម្មណ៍​អ្នកក្រោមបង្គាប់​ការងារ​ផង បើ​អាចជួយ​ពួកគេ​ដោះស្រាយ​បញ្ហា​បាន​នោះ​នឹង​ជា​បុណ្យ​កុសល​របស់​យើង ។ សុខ​ភាពល្អ​ធម្មតា តែ​តោង​កុំ​ផឹក​គ្រឿង​ស្រវឹង ប្រយ័ត្ន​មាន​គ្រោះថ្នាក់ ។ ចំពោះ​គូ​ស្វាមីភរិយា​មាន​ភាពល្អូកល្អឺន​ល្អ​ណាស់ ។ អ្នក​នៅ​លីវ​មានឱកាស​ជួប​មនុស្ស​ត្រូវចិត្ត ។

​ឆ្នាំមមែ​​

រាសី​មធ្យម ។  រាល់​កិច្ចការងារ​រកស៊ី​ជួញដូរ​មាន​សភាព​ធម្មតា ។ កំឡុង​ពេលនេះ​ទាក់ទង​នៅ​នឹង​​ការសម្រេចចិត្ត​ផ្សេងៗ ត្រូវតែ​តាំង​សតិ​ស្មារតី​ឲ្យ​បានល្អ សំខាន់បំផុត​កុំ​ធ្វេសប្រហែស​គ្រប់​ការងារ ។ ខែ​នេះ​ការចំណាយ​ច្រើន​ត្រូវ​ចេះ​គ្រប់គ្រង និង លៃលក​ឲ្យ​បានល្អ ។ ចំពោះ​អ្នកបម្រើ​ការងារ​តាម​បណ្តា​ក្រសួង​មន្ទីរ រោងចក្រ ឬ ក្រុមហ៊ុន​នានា តោង​ប្រយ័ត្ន​ចំពោះ​ការងារ​ដែល​ទាក់ទង​នឹង​កិច្ចសន្យា ឬ លុយកាក់ ។ សុខភាព​អាច​នឹងមាន​បញ្ហា​ទាក់ទង​ទៅនឹង​ប្រព័ន្ធ​រំលាយ​អាហារ ក្រពះ ពោះវៀន ដូច្នេះ​តោង​ប្រយ័ត្ន​ការហូបចុក ។ ចំពោះ​សម្ព័ន្ធភាព​គូ​ស្វាមីភរិយា​មាន​ភាព​រកាំ​រ​កូ​ស​ច្រើន ហេតុនេះ​ត្រូវ​ចេះ​អធ្យាស្រ័យ​គ្នា ។​

​ឆ្នាំវក​​

​រាសី​ឡើង​ខ្ពស់ត្រដែត ។ រាល់​កិច្ចការងារ​រកស៊ី​ជួញដូរ​មានការ​រីកចម្រើន​លូតលាស់​ទៅមុខ​ជា​លំ ដាប់ ។ រយៈពេល​នេះ​មាន​ប្រាក់ចំណូល​ហូរ​ចូល​ច្រើន តែ​គួរ​គប្បី​កុំ​វិនិយោគ​ទៅនឹង​ការងារ​អ្វីដែល​ថ្មីៗ គួរ​ប្រឹងប្រែង​ជាមួយ​ការងារ​ដែលមាន​ស្រាប់​វិញ​ប្រសើរ​ជាង ។ យ៉ាងណាមិញ​រាល់​ការសម្រេចចិត្ត​ធ្វើ​គម្រោង​ថ្មីៗ គួ​គប្បី​កុំ​ឆេវឆាវ និង សម្រេចចិត្ត​រហ័ស​ពេក ។ ចំពោះ​អ្នក​ប្រកបការងារ​តាម​បណ្តា​ក្រសួង​មន្ទីរ រោងចក្រ ឬ ក្រុមហ៊ុន​នានា រីកចម្រើន​ទៅមុខ​ល្អ ប៉ុន្តែ​ត្រូវមាន​ចិត្ត​អត់ធ្មត់​រង់ចាំ​ឱកាស ។ អ្វីដែល​សំខាន់​ត្រូវ​រក្សា​គោល​ការដែល​ធ្លាប់ធ្វើ​កន្លងមក ដើម្បី​ជៀសវាង​ការប៉ះពាល់​ដល់​មិត្តភក្តិ និង ការចោទប្រកាន់ថា ក្បត់​ពីក្រោយ​ខ្នង ។ សុខ​ភាពល្អ​ធម្មតា តែ​តោង​ប្រយ័ត្ន​អនាម័យ​ចំណីអាហារ ។ ចំពោះ​គូ​ស្វាមីភរិយា​អាចមាន ភាពប្រែប្រួល​ខ្លះ​ដោយសារ​ការឈ្លោះប្រកែក​គ្នា ដូច្នេះ​ត្រូវ​ចេះ​អត់ធ្មត់ និង ព្យាយាម​ដោះស្រាយ ។

​ឆ្នាំរកា

​​រាសី​ឡើង​ខ្ពស់ ។ រាល់​កិច្ចការងារ​រកស៊ី​ជួញដូរ​កាក់កប​ល្អ ។ កំឡុង​ពេលនេះ​មាន​ផ្កាយ​ទ្រព្យ​នាំ​ផ្លូវ និង មានឱកាស​បង្កើត​មុខរបរ​រកស៊ី​ផ្សេងៗ​ទៀត ។ ចំពោះ​អ្នក​ប្រកបការងារ​តាម​បណ្តា​ក្រសួង​មន្ទីរ រោងចក្រ ឬ ក្រុមហ៊ុន​នានា ការងារ​រលូន​ទៅមុខ​ល្អ គ្មាន​សម្ពាធ ពេល​ដាក់ចិត្ត​ធ្វើ​អ្វីមួយ​នឹង​បានសម្រេច ។ រយៈ​ពេលនេះ​ត្រូវ​យកចិត្តទុកដាក់​ផ្សារភ្ជាប់​ទំនាក់​ទំនងជា​មួយ​អ្នក​ជុំវិញខ្លួន​ដើម្បី​សម្រេចបាន​ឱកាស ល្អ​ទៅ​ថ្ងៃក្រោយ ។ សុខ​ភាពល្អ​ធម្មតា តែ​តោង​ប្រយ័ត្ន​បញ្ហា​ក្រពះ​ពោះវៀន ។ ចំពោះ​សម្ព័ន្ធភាព​ស្នេហា​មាន ភាព​ផ្អែមល្ហែម ។ អ្នក​នៅ​លីវ​អាច​រកឃើញ​មនុស្ស​ត្រូវចិត្ត ។

​ឆ្នាំច​​

​រាសី​ល្អ​មធ្យម ។  រាល់​កិច្ចការងារ​រកស៊ី​ជួញដូរ​មាន​សភាព​ធម្មតា ។   នៅ​ចុងខែ​នឹងមាន​បញ្ហា​ស្មុគស្មាញ​ច្រើន​បន្ដិច ។ ចំពោះ​អ្នក​ប្រកបការងារ​តាម​បណ្តា​ក្រសួង​មន្ទីរ រោងចក្រ ឬ ក្រុមហ៊ុន​នានា អាច​នឹង​ជួបប្រទះ​ឧបសគ្គ​បន្តបន្ទាប់ ដូច្នេះ​ត្រូវ​ប្រយ័ត្នប្រយែង​យកចិត្តទុកដាក់ គប្បី​កុំ​ឆេវឆាវ និង ពិភាក្សា​ជាមួយ​ថ្នាក់លើ ឬ អ្នក​ជុំវិញខ្លួន​ឲ្យ​បាន​ម៉ត់ចត់ ។ សុខ​ភាពល្អ​ធម្មតា ប៉ុន្តែ​សម្រាប់​បុគ្គល​វ័យ​ចំណាស់​អាចមាន​របួស​ដួល​បាក់​ឆ្អឹងឆ្អែង ដូច្នេះ​តោង​យកចិត្តទុកដាក់​បន្តិច ។ សម្ព័ន្ធភាព​គូ​ស្វាមីភរិយា​អាចមាន​បញ្ហា​រកាំរកូស​ខ្លះ ។

​ឆ្នាំកុរ​​

​រាសី​ស្រុតចុះ ។ រាល់​កិច្ចការងារ​រកស៊ី​ជួញដូរ​មានដំណើរ​ការយឺតយ៉ាវ ។ ក្នុងកំឡុងពេល​នេះ មិន​ស័ក្ដិសម​សម្រាប់​អ្នក​ក្នុង​ការបង្កើត​មុខរបរ​ថ្មី​ឡើយ ។ ក្នុង​ខែ​នេះ នឹងមាន​ចំណាយ​ចេញ​ច្រើន ហេតុនេះ​ត្រូវ​គ្រប់គ្រង​ការចំណាយ​ដែល​មិនចាំបាច់ ។ ចំពោះ​អ្នក​ប្រកបការងារ​តាម​បណ្តា​ក្រសួង​មន្ទីរ រោងចក្រ ឬ ក្រុមហ៊ុន​នានា ការងារ​មាន​សម្ពាធ​ច្រើន និង មាន​អ្នក​ច្រណែនឈ្នានីស ដូច្នេះ​ត្រូវ​ចេះ​អត់ធ្មត់ ហើយ​ដោះ​ស្រា យ​តាម​សម្រួល ត្រូវ​ប្រើ​ទន់​បង្ក្រាប​រឹង មាន​បញ្ហា​អ្វី​ក៏ដោយ​ត្រូវ​ដោះស្រាយ​ដោយ​សន្ដិវិធី​ដើម្បី​កុំ​ឲ្យ​មាន បញ្ហា​ធ្ងន់ធ្ងរ​ទៅ​ថ្ងៃមុខ​ទៀត ។ សុខភាព​ធម្មតា តែ​តោង​ប្រយ័ត្ន​សុវត្ថិភាព​ពេលធ្វើ​ដំណើរ​ទៅ​ទី​ឆ្ងាយ ។ សម្ព័ន្ធភាព​គូ​ស្វាមីភរិយា​មាន​សភាព​សោះកក្រោះ ៕

ចូលចិត្តអត្ថបទថ្មីៗទូទៅសូមចុច