ទេសភាព​សួនផ្កា​ស្នេហ៍​ ក្បែរ​ទឹក​ធ្លាក់​ជ្រៀវ ​ពិតជាស្រស់ស្អាតខ្លាំង

​ប្រ​សិ​នបើ​ភ្ញៀវទេសចរ​ជាតិ និង អន្តរជាតិទាំងឡាយ​មានបំណង​ចង់ទៅ​កម្សាន្ត និង លំហែកាយ​នៅ​ទឹកធ្លាក់​ជ្រៀវ​នោះ មុខជា​ប្រទះឃើញ​នូវ​ទេសភាព​ដ៍​ស្រស់ស្អាត​កម្រ​បានឃើញពីមុនមក​ ។ នៅតាម​ដងផ្លូវ​ជិត​ដល់​ទឹកធ្លាក់​ជ្រៀវ មាន​សួនផ្កា​មួយ ដែល​អ្នក​ទៅដល់ទីនោះ និង ​នៅ​បរិវេណ​នោះ​និយម​ហៅ​សួនផ្កា​ស្នេហ៍​ តាមពិត​អ្នក​នៅទីនោះ​គេ​ហៅ​ឈ្មោះ​វា​ថាច​ង្រ​ង់​ស្វា ដែល​បាន​លាតសន្ធឹង លើ​ផ្ទៃដីជាច្រើនហិកតា ​នៅលើ​ដីចំការ​អំពៅ ​ក្រោ​យ​ពី​គេ​កាប់អំពៅរួចមក ។​


​ ​សួនផ្កា​ស្នេហ៍នេះ ស្ថិតនៅ ភូមិ​អូរ​ដា ឃុំ​អម​លាំង ស្រុក​ថ្ពង ខេត្តកំពង់ស្ពឺ តាមពិត​ទីនោះ មិនមែនជា​សួន​ធម្មជាតិ​ឡើយ គឺ​វា​ដុះ​ចេញ​ឡើង ​ពី​ការដាំ​របស់​ក្រុមហ៊ុន​ស្កអំពៅ​ដើម្បី​បង្កើន គុណភាព​ដី​ ក្រោយពី​គេកាប់​អំពៅ​រួច ។ បន្ទាប់មក​គេ​ក៏​ភ្ជួរ​កប់ដើម​ផ្កា​ស្នេហ៍​នោះ​ឱ្យ​ពូក​ផុយ​ទៅ ជា​ជីធម្មជាតិ​ទ​ម្រាំ​ដល់​រដូវ​ដាំ​អំពៅ​គេ​នឹង​ចាប់​ដាំ​អំពៅ​បន្តទៀត ។​


​ ​បើតាម​កម្មករ​ចំការ​អំ​ពៅ​នៅ​ទីនោះ​បាននិយាយថា ចាប់​តាំ​ពី​ដាំ​ផ្កា​ស្នេហ៍​មកភ្ញៀវ​ទេសចរទាំងឡាយ ​ដែល​ទៅលេង​ទឹក​ធ្លាក់​ជ្រៀវ ​បាននាំគ្នា​ទៅលេង​សួនផ្កា​ស្នេហ៍​យ៉ាងច្រើន ​ពិសេសគឺ​ថ្ងៃ​ចុង​សប្តាហ៍​តែម្តង អ្នក​បាន​ចុះ​ថត​ផ្តិត​យក​រូបភាព​ដ៏​ស្រស់ត្រកាល​នេះ​ដើម្បី​ទុកជា អនុ​ស្សវ​រី​យ៍​ទៀតផង ។​


​ ​បើ​យើង​ធ្វើដំណើរ​ពី​ភ្នំ​ពេញទៅដល់​សួនផ្កា​ស្នេហ៍​ ឬ​ ទឹកធ្លាក់​ជ្រៀវ​តាម​រថយន្ត​​នោះ ​ត្រូវចំណាយពេល​ប្រមាណជា​២​ម៉ោង លើ​ចម្ងាយ​ផ្លូវ ១១០ គីឡូម៉ែត្រ ដោយ​ចេញពី​វត្តភ្នំ​តាមផ្លូវជាតិ​លេខ ៥ ដល់​ផ្សារ​ឧ​ត្ត​ង្គ បត់ឆ្វេង​រហូតដល់​ផ្សារ​អម​លាំង រួច​បទ​ស្តាំ​ប្រហែល ៦ ឬ ៧
​គីឡូម៉ែត្រនោះ ​យើង​នឹង​បាន​ដល់​ចំការ​អំពៅ​ ដែលមាន​សួនផ្កា​ដ៏​សែន​ស្អា​ត់​នេះ ។

​ហើយ​បើ​ចង់​បន្តដំណើរ​ទៅ​ទឹកធ្លាក់​ជ្រៀវ​ ដោយ​គ្រាន់តែ​ដើរ​ដោយ​ថ្មើរ​ជើង​​ប្រមាណជា ៥ នាទី​ទៀតនោះ​នឹង​បាន​ទៅដល់​ទឹកធ្លាក់​ជ្រៀវ​ដំណាក់​ទីមួយ ។

ប៉ុន្តែ​បើ​ធ្វើដំណើរ​មកពី ខេត្ត កំពង់ស្ពឺ វិញ​គឺមាន​ចម្ងាយ​ផ្លូវ​ជាង ៨០ គីឡូម៉ែត្រ ។ ចំពោះ​ផ្លូវ​ធ្វើដំណើរ​វិញ​គឺ​ផ្លូវ​ក្រាល​គ្រោះក្រហម​យ៉ាង​ល្អ​ស្អាត​អាចធ្វើ​ដំណើរ​រថយន្ត​តូចៗ​ពី​ភ្នំពេញ​ក៏បាន ឯ​បញ្ហា​សន្តិសុខសម្រាប់​​ទេសចរ​ណ៍​វិញ​គឺមាន​លក្ខណ​ល្អប្រសើរ ៕ សុថា​ត់​


ចូលចិត្តអត្ថបទថ្មីៗទូទៅសូមចុច