ហេតុអ្វីបានជាតារាល្បីៗ ចូលចិត្តពាក់ស្បែកជើងធំជាងជើង ?

អ្នក​ប្រហែលជា​ពុំបាន​ចាប់អារម្មណ៍​ទេ​ថា តារា​ល្បីៗ ច្រើនតែ​ចូលចិត្ត​ពាក់​ស្បែកជើង​រលុង​បន្តិច យ៉ាងហោចណាស់ ធំ​ជាង​ទំហំ​ជាក់ស្តែង ១ ​លេខ​ដែរ​ ។ ហេតុអ្វី​បានជា​យ៉ាងនេះ ​? តើ​នេះ​ជា​ម៉ូដ ឬ​ ជា​ស្តាយ​របស់​ពួកគាត់​ឬ​យ៉ាងណា​ ?

​តារា​ហូលីវូដ​ជាច្រើន ចូលចិត្ត​ពាក់​ស្បែកជើង​លេខ​ធំ​ជាង​ជើង ១ ​លេខ ព្រោះថា​ការពាក់​ស្បែកជើង​កែង​សល់​កែង​បន្តិច​បែបនេះ អាច​នឹង​ជួយ​សម្រួល​ប្រអប់ជើង​បាន​ច្រើន គឺការពារ​មិនឱ្យ​ហើម និង​ ឡើង​ពងបែក​ ។ តារា​ស្រី​ត្រូវតែ​ពាក់​ស្បែកជើង​កែង​ជា​ចាំបាច់ ថែមទាំង​យូរ​ម៉ោង​ទៀតផង ដូចនេះ ល្បិច​មួយ​នេះពិតជា​អាច​កែកុន​បាន​ច្រើន​។​

 

​ដើម្បី​ការពារ​មិនឱ្យ​ឈឺ​ប្រអប់ជើង ដើរ​មិន​ស្រួល និង​ បណ្តាលឱ្យ​ឈឺចាប់​ប្រអប់ជើង​រ៉ាំរ៉ៃ​ច្រើន​ថ្ងៃ​ទៀត​នោះ តារា​ហូលីវូដ​ល្បីៗ ជ្រើសរើស​ស្បែកជើង​ដែល​រលុង​បន្តិច ណាមួយ​ស្បែកជើង​រលុង មិន​ថា​ជា​ប្រភេទ​ឃ្លុប​មុខ ឬ ​សង្រែក​ទេ គឺ អាច​បញ្ចៀស​បញ្ហា​កកិត​ខ្លាំង ឬ ​ចង្អៀត​ដែល​បង្ក​សម្ពាធ​ដល់​ជើង​ងាយ​នឹង​ឈឺ​ពិបាក​​ដើរ​ ។

 

​ការពាក់​ស្បែកជើង​លេខ​ធំ​បែបនេះ ប្រាកដជា​រលុងៗ និង ​ងាយ​រអិល ដូចនេះតារាៗ​តែងតែមាន​វិធី​កែខៃ ដោយ​ប្រើ​បន្ទះ​ស៊ី​លី​កូន​កល់​ពីក្រោម ធ្វើឱ្យ​មើលទៅ​សាច់​ជើង​ហិប​ណែន​នឹង​ស្បែកជើង បែបនេះ​ជើង​មាន​លំនឹង ចរន្តឈាម​ហូរ​ស្រួល និង​ មិន​ឡើង​ហើម​ប្រអប់​ជើងទេ ​។​

 

​វិធី​មួយទៀត តារា​ស្រី​ច្រើន​ចូលចិត្ត​ប្រើ គឺ​ប្រើ​ស្កុ​ត​មុខ​ពីរ ដើម្បី​ទប់​ប្រអប់ជើង​មិនឱ្យ​រអិល​របូត​ចេញពី​ស្បែកជើង ជាពិសេស​សម្រាប់​ស្បែកជើង​កែង​ឃ្លុប​មុខ​៕ ​លក្ខិណា 

ចូលចិត្តអត្ថបទថ្មីៗទូទៅសូមចុច